Vatan yoshlari
Vatan yoshlari
Biz o‘zbek yoshlari, Vatan yoshlari,
Vatan taqdiriga taqdirdosh nasl.
Millatning bir jon-u bir tan yoshlari,
Buyuk kelajakka daxldor, mas’ul!
Mardona-mardona tashlaylik qadam,
Ozod yurt, obod yurt bo‘lsin mukarram!
Ota-bobolardan jasorat meros,
Barhayot shonlari, ular kimniki?
Nomusi, vijdoni, e’tiqod-ixlos,
Barchasi bizniki, barchamizniki!
Mardona-mardona tashlaylik qadam,
Ozod yurt, obod yurt bo‘lsin mukarram!
Ona O‘zbekiston yo‘li porloq, oq,
O, uning ertasi o‘zimizdadir.
Abadiy porlasin muqaddas bayroq,
El-yurtga qo‘limiz ko‘ksimizdadir!
Mardona-mardona tashlaylik qadam,
Ozod yurt, obod yurt bo‘lsin mukarram!
